السلام عليكم ورحمة الله .. وبعد..
انا بصراحه من مجالستي لبعض الزملاء .. المتزوجين طبعاّ لقيت بعضهم .. مبسوط معنا لو يمر اربع ايام ماراح البيت عادي.. وبعضهم .. بس يجلس ربع ساعه .. ولا نص ساعه بالكثير .. ويرجع البيت .. لفت انتباهي هالموظوع.. ليش بعض الناس مايرتاح الا في بيته .. وبعضهم مايصدق على الله يطلع منه.؟؟حاولت اني اعرف السر منهم بس بطريقه غير مباشره .. فعزمت اثنين متزوجين واحد منهم مايحب بيته لدرجة انه اكثر الاحيان ينام فالاستراحه(حتى مره واحد من العيال قال الزواج زي الدرام اوله عسل واخره زفت .. فقال خوينا ذا(( اللي ما يحب البيت)) الظاهر اني فتحت الدرام بالمقلوب) .. والثاني ما يرتاح الا في بيته حتى الاكل ما اذكر انه اكل معنا فالاستراحه بس يجي يجلس ويروح.. طبعا حنا يالعزابيه بعد الدوام مع الاهل والليل بالاستراحه لعب وسوالف ومن هالسوالف..طبعا انا عزمتهم فالبيت عشان هم يردون لي العزيمه وادخل بيوتهم واشوف وش الفرق .. وطبعا عزمني الاول في بيته وجيته ..اول مافتح الباب الا ريحة البخور واصله الخرج..والمجلس صح ان اثاثه مو من الغالي مره بس ترتيبه وتنسيقه جناااان..بصراحه انا ارتحت اول مادخلت..جلست شوي الا والعصير والكيك .. وبعدها القهوه اللي ودك بس تتفرج فالدله بس ..وجلسنا نسولف .. وسألته فهد تنصحني اتزوج؟
قال اي والله تكفى لاتتأخر والله ان تشوف للدنيا طعم ثاااني وان ترتاااح راحه نفسييه رهيييييييييبه.. قلت وش اللي راح القاه لما اتزوج ؟((بديت اقرب من الشي اللي ابي اوصل له ))قال تخيل ياعلي ..انسان من يصحى الصبح الين ينام وهو ماعنده الا انت ويهتم فيك ويراعيك ويدلعك ..وما تسمع منه الا الكلمه الحلوه .. ولو تجيب شي بسيط تلقى من الشكر اللي يغرقك.. وتلقى اكلك اللي تحبه جاهز.. وفراشك مدلع واغراضك مرتبه.. يعني تحس بالدنيا ((طبعاّ وهو يتكلم وانا اذكرالله واسمّي على هالبنت اقول ماشاءالله كل هذا فيها ..)) قلت طيب ماتحس ان الزواج ربطه ؟قال بالعكس تحس انك مهم ومتحمل المسؤليه .... وقعد يشرح لي الزواج ((بس انا عارف انه يتكلم عن نفسه وزوجته )) ولما جاء العشاء يالله هذيك السفره ودك تصور معها مو تاكل منها.. تعشينا وطلعت .. بعدها بيومين عزمني الثاني ورحت له .. اول ما وصلت الا وهو فاتح الباب ويرحب واول ما دخلنا المجلس قام هو يرتب المراكي ويشيل البلاي ستيشن ويرتب الجرايد وشال اكواب ووداها داخل ((قلت في نفسي كني جاي فجأه ولا بدري ماكنه عازمني بهالوقت .. يعني زوجته ماتدري ان عندهم ضيف الليله ؟؟)) وجلسنا نسولف وعشان اشيل الرسميات قلت تتحدى بلاي ستيشن قال يالله وحنا نلعب قعدنا نسولف قلت محمد تنصحني اتزوج ؟؟قال وشو|؟؟؟؟؟؟؟؟؟ نصيحه انحش عن الزواج قسم بالله تكره اليوم اللي تزوجت فيه .. طبعا ماكنت متوقع هالاجابه .. (( اللي اختصرت علي اشياء كثيره)) قلت افا ليش .. قال ياخي رفعة ضغط .. ود وجب وهات طالع حمال ونازل زبال ((اعجبني تعبيره ))قلت وش بعد قال هوشه وقلة حيا .. وين طالع وين رايح من وين جاي ومن تكلم ..وبس هات الف هات الفين .. قلت يابن الحلال وش نسوي هذي الدنيا قال والله اني اشتقت للعزوبيه والحريه((ركزو على الحريه يعني ان بيته صار سجن !!)) ولما جات القهوه بعد مالعبنا مباراااااااااااتين .. قهوه ستندر .. ماعليها شي .. المهم هودخل وقعد شوي الا الباب يرجف ولا وهو جايب تمر وحلا .. ويقول عمى حريم اخر زمن .. قلت ليش قال ذابحهم الكسل .. المهم بيني وبينكم ندمت اني جيت ودي يجي العشاء واطلع تعشينا عشاء ستندر برضو ..ساده ماعليه شي لا حلا ولا سلطات ولا حركات ..((واللي ابيكم تعرفونه ان هذ بيته ملك الاول مستأجر.. وهذى راتبه يمكن دبل راتب هذاك المبسوط)).. المهم طلعت ورحت البيت ودخلت الغرفه وقعدت افكر وش هالفرق الشاسع بين البنتين وحدت جعلت من شقه جنة زوجها ووحده جعلت من فله ((سجن)) زوجها ..
منقول للفائدة العظيمة
لماذا تكون الحياة سيئة مثل جهنم ..؟
ماشاء الله على الاولها إنسانه راائعه ومتميزه تقدر الحياة السعيدة والزوجيه
التعليق
تحيااااتي للجميع

شكرا لك ** على الموضوع المميز والرائع