والله إللي صاغ معدنك الفريد
وكوَّن الطيبة وسوَّاها مَرَه


إنتي شيخة عز وإنتي تاج غيد
وانتي أكبر من قصيد(ن)أنثره


إنتي حبي الجارف العذب الوحيد
تفضحه عيني ولااقدر أنكره


في جبينك للفرح ميلاد عيد
وفوق متنك ليل أجهل آخره


بين ثغرك تنتشي بسمة وليد
وفـ/ عيونك سحر ماله مغفره


كن وجهك من حلا نوره يقيد
وين ليلك..؟ نور وجهك بعثره


كل غيداء حسنها بعدك زهيد
وكل زينة لا ظهرتي جيكره


والله مالك بين خلق الله نديد
البهاء والملح وحدك مصدره


من جمالك تنحني لك ألف جيد
ومن خصالك لقَّبوكِ الكوثره


وإن بغيتي من متيمك المفيد
إنتي حسنك فاق حد المقدره


من بنات الحور لكنه يزيد
عن بنات الحور في عيني اشْعَره


لو أظل أشطب في أبياتي واعيد
يستحي قافي واقول المعذره


أدري ما يوفيك نظمي والقصيد
الحروف حروف وانتي .. جوهره

بقلمي