) - قالك هاذي عجوز كبيرة في عرس ، قالو ليها ماديري والو ، غير تهللاي في البرمة نتاع " السفة " ( السفة هي تمر يابس ، يفوروه في البرمة باش يلين ) . أيا بدات البرمة تغلي وبدا البخار يضغط في الكوزينة ، العجوز من الضغط داخت ، داوها للسبيطار ، ضربها الطبيب بصفعات فاقت ، قاللها الطبيب واش عرفتيني ، قالت ليه عرفتك إيه ، قاللها شكون أنا ، قالت ليه " السفة " .







2)- قالك هذا واحد مؤذن في مسجد قريب من منزل نتاع شخصية كبيرة ، كل ما يأذن في الفجر ولاد هذا الشخصية يخافوا ويتخباو هذا باباهم ، أيا واحد النهار راح هذا السيد للمؤذن وقال ليه ، شوف تزيد ديرونجي لولاد مع الفجر ، نجي نطرطق لك راسك هنا في المسجد ، المؤذن خاف ، وقال في نفسه ، كون ما نأذنش حرام عليا ، والناس يحاسبوني . أيا ناض غدوة الصباح وفتح الميكرفون وقال بصوت مضيفة الطائرة " الله اكبر ، الله اكبر ، أيها الراغبون في صلاة الفجر تفضلوا وبهدوء ، شكرااا "





3)- قالك هذا واحد ، تلاقى مع واحد صاحبوا في ولاية أخرى ، أيا قال ليه جابك ربي تخلص لي فطور ، قالو وجهك خير وشعرك كوير ، لكن بشرط ، نروحوا نغطسوا في الماء واللي خرج الأول يخلص لفطور ، مالا راهم من العام اللي فات مازال ما خرج حتى واحد فيهم .





4)- قالك هذا واحد مشحاح كان راكب في الترونسبور ، أيا في الطريق سرات بيهم آكسيدو ، كاين فيها المبليسين والموتى ، أيا هذا السيد قاعد يقلب في الموتى ، قالوا واحد أنعل بليس آصاحبي هاذوا راهم موتى ، قال ليه ، لالا راني نحوس على الروسوفور نسالوا 3 ميل .







5)- قالك هذا واحد يلعبها يعرف الفرونسي ، كتبوا ليه رقم 3 ، وقالوا ليه قولو بالفرونسي ، قال ليهم " تروا " ، زادو ليه 33 ، قال ليهم " ترونت تروا " زادو ليه 333 قال ليهم " ترواسون ترونت تروا " ، زادوا ليه 3333 ، ماعرفهاش ، قال ليهم " طررررررررررررررررر " .

شكرا لك اخي